今天草蜢的蔡一傑的農曆生日，加上時近歲晚，草蜢三子特別與同樣曾是歌手的經理人林珊珊一起錄製賀年網上節目。草蜢三位成員更大談牛年計劃及兒時渡歲回憶，傑少更開玩笑說若請蔡一智、蘇志威到《傑少煮意》做嘉賓的話，會預備草蜢湯、草蜢蒸蛋招呼他們。
蔡一智説：「我最懷念一大班屋企人一齊圍埋，搓麵粉炸角仔，一齊搓一齊整，係好好嘅親子樂。」蔡一傑馬上回應説：「講到賀年菜當然少不了好意頭嘅橫財就手，但今年係牛年，咁就順吓你意搵機會整味『傑少牛角仔』你哋食，寓意牛氣冲天牛運當頭啦。」
蘇志威也回憶説：「我最懷念細個過年食嘅『薑蔥屈鯉』，因為我怕骨，最多食魚頭，唔多食原條魚。」傑少也踢爆他說：「蘇志威完全唔入廚房，望見把刀都會打冷震，又怕魚骨，所以我都好少整魚俾佢食。」
過新年大家都會習慣穿新衣，說到新衣蔡一智也不禁想起兒時父母為他和傑少兩兄弟打造的過年造型，他說：「細個唔係成日買新衫，但父母過年前都會整一啲兄弟套裝俾我哋兩個，大家一樣色一樣款唔使爭，我最記得細個有一年果套啡色牛仔裝。」身旁的傑少也和應説：「呢套真係一世都記得，啡色嘅牛仔衫套裝真係好少見。」
眼見三人老友鬼鬼圍埋講食經講得如此投入，傑少也不禁有個新想法，他說：「其實我哋三個都好為食，坐埋一齊講食一定好多嘢講，我哋今年可以大展拳腳，首先《傑少煮意》 可以搵一集草蜢做嘉賓，除咗我哋三個真人之外，我哋重可以食草蜢，我預備定啲草蜢湯、草蜢蒸蛋 ... 俾大家歎。」
蔡一智進一步說：「咁更進一步不如做一個頻道，講吓我哋遇過食過嘅嘢啦。」傑少回應説：「個名我都馬上諗到，好直接就叫草蜢頻道，因為呢個名喺過去咁多年帶俾我哋咁多榮譽，大家一見到就會諗起我哋。」
拍攝完畢後，傑少在拍攝場地遇上11歲小女孩粉絲為他送上親手製作的生日禮物，補祝他2月6日生日。他說：「小女孩親手畫咗張生日咭俾我，咭上畫上草蜢在演唱會台上的精彩舞姿，好靚好神似，佢重寫咗話希望疫情過後希望可以再睇到我哋嘅演唱會，真係好開心。」
蔡一智亦回贈他親自設計繪畫的利是封給她，他也感歎其實草蜢在 2020 年本來有不少計劃，不過都因為疫情而停下來。他說：「其實好多粉絲都期待我哋做演唱會，睇吓上天今年嘅安排啦，不過我哋就隨時都準備好，好似我咁每個星期都跑步，希望大家都做多啲運動，到時可以陪我哋一齊又唱又跳。」
編輯：安迪
==========================
🎤HONG KONG SINGER CHANNEL🎤
💛讓每一個人唱出心聲💛Let Everyone Sing From Their Heart💛
Follow我哋👇🏻👇🏻🥰🥰
▶️Facebook: Hong Kong Singer Channel
▶️Youtube: hksingerchannel
▶️Website: www.hksingerchannel
▶️Instagram: hkscchannel