Strayz自資成團 首登舞台重新編製歌曲誠意十足 技術故障執生夠快 爆爛gag笑爆全場 反客為主自製曲奇心意卡贈Fans 由《全民造星4》幾位參賽者 VAL、CK、暐翹、榛綦及Ariel自資組成的女團Strayz於昨日正式亮相，並首度於公開場合演出。幾位成員的心情都十分興奮，為了這次演出更做足準備，窩心的5人更自備禮物送Fans，反客為主冧爆Fans。 Strayz隊名源自「Stray（流浪）」一字，象徵隊長VAL、副隊長CK、暐翹、榛綦及Ariel 5人是一班流浪的小朋友。以「流浪」形容自己，VAL解釋道：「我哋冇簽公司，自資做自己想做嘅音樂，因而得名。」昨日5人以女團身份首度出Show，參與《TIME’S UP Live》，演繹〈#A5110〉、〈純孩兒〉及〈Stray〉3首作品，其中〈Stray〉更是他們即將推出的首支派台歌，於派台前讓觀眾先聽為快。首度以Strayz名義演出，大家都既開心又期待，眾人更十分重視這次演出，特地於演出前三星期將歌曲重新編曲，再加以練習，CK表示：「其實得知有演出機會嘅時候，當下好興奮係真嘅。雖然籌備演出時遇到唔少困難，但我哋都有準備好自己，亦有勤加練習，希望做到最好，同時亦希望每位成員演出得舒服，觀眾又睇得開心。」CK更指，他們都是懷著感恩的心情踏上舞台，這次演出拼盡全力。而首度演唱〈Stray〉，暐翹坦言十分期待，她說：「因為首歌對於我哋嚟講意義好大，當中所有歌詞嘅意思都係我哋想表達嘅Message（訊息）同感受，所以想用好真誠同開心嘅感覺去唱俾大家聽。」 不過在昨晚的演出中，Strayz在準備唱第二首歌時，現場出現了技術問題，一直未能開始演唱，Ariel隨即情急智生，在台上以爛gag當笑話，與VAL一唱一和，成功帶動了現場氣氛，不過事後暐翹笑言：「Ariel係我哋嘅笑話擔當，我哋平時相處都係咁樣。」Ariel則繼續搞笑道：「其實係Plan咗有個位俾我講笑，所以唔使擔心。」而處女演出過後，VAL坦言剛開始時略帶緊張，她說：「唱第一首歌時係有少少緊張，跟住第2、3首歌就放鬆晒！」Ariel也指見到朋友在台下不停在拍她，看到熟人的她心情也變得輕鬆起來，而CK則道：「我在〈純孩兒〉時有啲尷尬，因為有啲位我冇乜得唱，行行企企，但因為好多Cam（攝影機）對住我，就諗住擺甫士，但擺極都唔啱，好在跟住第3首可以郁動多啲，令我真係釋放！」 對於Strayz的首度登場，CK只俾自己60分，因為她覺得可以做得更加好，Ariel則表示要睇Playback才知表演如何，但感覺上，應該可以有70至80分，而台下Fans熱烈的反應，都教眾人十分感動，特別是VAL，她說：「見到台下好多燈牌，好開心，好想完Show即刻出去搵佢哋！」暐翹又透露，為了答謝Fans的厚愛，她們特別為Fans準備了小禮物，她說：「榛綦係我哋嘅廚藝部，佢整咗曲奇，再加埋我哋做嘅心意卡，送俾Fans。」平時只見Fans推出應援撐偶像，但Strayz卻自製禮物送Fans，夠晒反傳統呢！ Strayz首支派台作品〈Stray〉即將隆重推出，敬請期待。 ========================== HONG KONG SINGER CHANNEL 💛唱出心聲💛活出生趣💛音樂｜生活｜電影💛 Follow我哋👇🏻👇🏻🥰🥰 ▶️Facebook: Hong Kong Singer Channel ▶️Youtube: hksingerchannel ▶️Website: www.hksingerchannel ▶️Instagram: hkscchannel #hksingerchannel#hongkonsingerchannel#香港歌手#hksinger#hksinging#hkscchannel#歌手#hkig
top of page
bottom of page