KAHO洪嘉豪｜《The Cycle Of….KAHO》內部認購一早爆哂！好叻仔呀！｜Channel音樂
洪嘉豪迎來人生第一個個人演唱會 ，一開就兩場，每場七千位，等同開兩場紅館三面台。兼且內部認購一早爆滿，認真叻仔！ 早前KAHO影海報，把演唱會主題「The Cycle Of 春夏秋冬」置於身上！七彩繽紛服裝，開心靚仔之餘，臉上又有滴銀色淚，原來全是他演藝路上一路走來的縮影。 KAHO表示，《The Cycle Of….KAHO》包含了他的演藝生涯歷程，也包含了整個人生：「好多嘢都係由一個循環組成，人生、愛情，我新歌《還原淚》都係講緊一個循環。今次想成個主題都圍繞開心歡樂，所以你見我身上都係七彩繽紛。但又有春夏秋冬循環縮影。」 首次開個唱，KAHO知不知道其實自己等同開緊兩場紅館咁多人？KAHO 驚訝地說：「咦....係喎......真係唔敢相信架！第一次聽到腳都震。(內部認購已經爆曬啦喎！仲震？ ) 下？爆左？我都係依家先知！慘啦咁就，我仲有好多兄弟、朋友、屋企人未落飛...我仲獅子開大口答應左佢地，今次一定買到飛，我點算啦.....依家點算？」 他還說 : 「今次係我第一次個人騷，我一直願望係開戶外演唱會，能夠喺 AXA x WONDERLAND 達成呢個願望，我已經好開心，我同時真心希望我屋企人，朋友，兄弟，仲有一班由細陪我長大的歌迷，我希望佢地全部都可以在場，同我一齊見証呢個大日子，佢地無論我高高低低都係我身邊，對我來講，係好重要的人！」 問到KAHO既然主題係一個「循環」，咁會唔會都益歌迷，循環咁唱不停？KAHO笑道：「我剩係知我要堅強少少，唔好咁早喊囉。次次都會比歌迷感動到想喊。今次希望忍到啦。循環咁唱一定會係尾場啦，我自己都唔捨得，公司比我唱到幾點就幾點架啦。」 為了這次演唱會，KAHO表示，上次 Frenemy show已經開始操，至今沒有停下來，不用開工的日子，都繼續勤力操練中：「唔係為騷唔騷肌，係真係覺得操左之後，個人精神，體力都好左好多，成個人挺直左，好鐘意自己這個狀態，所以會一路keep住。除唔除衫未知呀....11月都涼啦 ….到時入場睇囉！開始籌備呢個騷，我先覺得，係個舞台上面真係要識雜耍一樣，幸好自己細個咩都玩下，所以都可以預告一定會有新驚喜比大家囉。至於跳舞就當然係會苦練啦！一定會跳得好過上次！」 KAHO來影樓影相前發生意外，一向悲觀仔的他說:「我住得遠係人都知 ，要11點到達開工，我好早起身準備啦！好準時過緊海，諗住仲有七分鐘，一定早到添，點知就係呢一刻，係隧道入面，聽到架車「噗、噗、噗」聲。我當時係中間線停唔到車，心諗唔係爆呔呀？捱到出隧道口，停埋一邊一望「爆曬！」好彩有個職員哥哥來救我，問我用不用幫手，仲開條私家路我行，我入私家路之後，一、兩分鐘轉出來就已經係汽車維修店！雖然遲到少少，但係都安全到步，完成到工作。」 在場同事即反問悲觀仔KAHO：「你唔係倒霉喎，你係好好彩！你爆咗有人幫，仲開條光明大道你行，你行運啦你！點會係倒霉？」KAHO傻笑一輪:：「係喎，我真係要改下自己悲觀性格！哈哈，係喎車房都係話，你好彩啦你，唔駛叫拖車！」他隨即開心大叫：「我好好彩呀今日！YEAH！」 《AXA安盛 The Cycle Of… Kaho Hung Live 2022 》 日期： 2022年11月12日 及13日 時間 : 晚上8 時15分 地點： AXA x WONDERLAND | 安盛 x 竹翠公園 地址： 西九文化區苗圃公園 票價：HK$780 | $580 恒生Mastercard客戶優先訂票 優先訂票日期: 2022年10月10日(上午11時) 至 10月12日 (晚上11時59分) Mastercard 持卡人專享Mastercard Priceless Box貴賓包廂, 密切留意https://www.priceless.com探索更專屬體驗。 公開發售 發售日期: 2022年10月19日 上午 11時 使用Mastercard 搶飛，更可享免$22手續費優惠。 訂票渠道：TIX-GET-GO.KKTIX.CC ========================== 🎤HONG KONG SINGER CHANNEL🎤 💛讓每一個人唱出心聲💛Let Everyone Sing From Their Heart💛 Follow我哋👇🏻👇🏻🥰🥰 ▶️Facebook: Hong Kong Singer Channel ▶️Youtube: hksingerchannel ▶️Website: www.hksingerchannel ▶️Instagram: hkscchannel #hksingerchannel#hongkonsingerchannel#香港歌手#hksinger#hksinging#KAHO#洪嘉豪 Hung KAHO 洪嘉豪 Hung KAHO 洪嘉豪