ERROR｜I Promise｜Channel新歌推介

男團ERROR推出本年度首支新歌《I Promise》 ，歌曲以寵物為題，意旨除了人與人之間的承諾之外，人與寵物的承諾亦很重要，帶出不要棄養寵物的訊息；日前ERROR四子：肥仔（梁業）、阿Dee（何啟華）、193（郭嘉駿）及保錡（吳保錡）齊齊為歌曲拍攝MV，期間四子更「落區」到鬧巿取景拍攝，吸引不少巿民圍觀，而今次新歌亦是保錡宣布停工前拍攝的最後一個MV。

在新歌《I Promise》的MV中，不乏流露ERROR輕鬆惹笑本色，跟多隻「人形貓」拍攝，ERROR四子更要不斷笑着重複點頭動作，難怪他們表示今次MV拍攝非常疲倦，名符其實笑到牙骹軟，而193就笑言：「個MV真係好似邪教，全日都係咁笑同點頭。」身旁肥仔則表示今次MV是「萬能Key」，跟任何一首歌曲都可以配對。除了點頭之外，問到今次拍攝過程可有難忘事？肥仔表示難忘「落區」：「今次我哋仲去咗啲熱鬧嘅地方拍攝，感覺都幾尷尬，因為好多人圍觀，幾大壓力。」

謝浩文助陣伴唱

今次MV以貓為題，問到四子之中有否「貓奴」？阿Dee即表示：「一定係193，當佢畀一大堆貓圍住時，佢會變成貓奴，郁都唔敢郁同埋瘋狂咁尖叫。」原來193非常驚貓，他坦言：「如果今個MV用真貓，我會唔拍，好彩係假貓。」

此外，《I Promise》由歌曲《我們不碎》班底所組成，謝浩文編曲及監製、周耀輝作詞，ERROR表示謝浩文更為歌曲伴唱，他們笑言希望歌曲能夠在各大電台頒獎禮得獎，屆時可以邀請謝浩文一齊上台唱歌。