top of page
Search

ERROR 肥仔 193 同日推歌《Dear MAMA》《再次Puppy Love》訪問|Channel音樂


ERROR 肥仔 193 同日推歌《Dear MAMA》《再次Puppy Love》訪問|Channel音樂


宇宙天團Error兩位成員肥仔及193同是1990年1月14日出世,適逢今日齊齊生日,二人分別推出Solo歌。肥仔新歌〈Dear MAMA〉大談親情,MV更邀得影后級人馬鮑起靜飾演媽媽角色,獲對方幫助帶入戲,演技即時大爆發; 193新歌〈再次Puppy Love〉 則是情歌一首,為了自肥,193找來林明幀一同回母校拍攝甜到漏MV,可惜計劃卻失敗了。 肥仔過去試過發夢遇到親人離世,所以觸發他製作了〈Dear MAMA〉這歌,他說:「都知道大家好愛對方,但唔敢親口講句多謝,又唔想自己有任何後悔,新歌〈Dear MAMA〉就係代表我唔敢講出口嘅說話,唔講出嚟,就唱出嚟。」為了配合歌曲內容,今次〈Dear MAMA〉MV亦大賣親情,肥仔更找來鮑起靜飾演媽媽,因為對方予人親切感,令他輕易代入對方就是自己的媽媽,但遇上影后,肥仔自言都有點怯,說:「同前輩合作梗係怯啦!但鮑姐Nice到一見面就同已經同你傾兩句偈,俾人好祥和嘅感覺,唔會有隔閡,同想像嘅一樣。」 肥仔更透露,多得鮑姐,MV中他輕易入戲,更喊過不停,他回憶道:「有場喊戲,起初以為自己唔知要演幾多次,心諗最好一Take過啦!點知喊完一次,導演真係要我嚟多次,心諗唔係啩,點知呢個時候,鮑姐突然行過嚟摸下我個頭,我就輕易代入返角色,又再喊多次,結果我前後喊咗半個鐘!」今次的〈Dear MAMA〉,肥仔坦言是送給自己媽咪的禮物,但對方還未看過MV,亦不知道MV內容,所以希望屆時媽咪看到會感到驚喜。 至於193的〈再次Puppy Love〉,則以「初戀可以嚟多次」作狂想,193今次除了繼〈睡到三點〉再次參與填詞工作外,也全情投入MV的製作,他說:「一開始已諗到MV畫面要有朦朧美,有以前8、90年代檸檬茶廣告嘅Feel, 於是搵咗《Error自肥企画》兼《花姐Error遊》的Writer阿輝幫忙度橋。」不過對於劇情193大賣關子,叫大家今晚睇MV,他更說:「未睇到最尾都唔知發生咩事,睇埋最後彩蛋先可以解讀到。」 MV橋段暫未能公開,但193透露今次找來林明幀擔任女主角,二人一同飾演學生,事前當然跟阿輝要求要自肥,劇情中最好加入一些身體接觸情節如頭貼頭、臉貼臉的場面,不過最終事與願違,193大嘆道:「今次我返自己中學拍攝,都特登來來回回幾次返去學校同校長傾,但我母校比較專注學業,校長睇完故仔之後話唔得,因為學校唔鼓吹學生談戀愛,所以最好唔好有呢啲戲份。咁我梗係用咸濕仔角度,再問校長呢啲戲份可唔可以移師去公園或其他街道拍攝啦,但最終都係被拒紀,所以對校長……Respect!」其實〈再次Puppy Love〉MV還有3妹(193妹妹)、造星4 Candy及Yoyo、Delta T及霍哥@微辣客串其中,星光熠熠。 〈再次Puppy Love〉不僅MV很有畫面,就連歌詞都十分露骨,令人想入非非,不過193卻說:「我又唔覺得露骨,如果覺得露骨就係你咸濕。今次唯一一句比較露骨,係『曾幻想一天觸碰你身軀 全日盡在被窩暢聚』,本身仲露骨,係『曾幻想一天觸碰你雙腿』,如果用雙腿就真係太露骨喇!」193指他寫這句歌詞時只是構思一個中學生,幻想自己三十多歲時,在某個周日早上,於美滿的家裡睡覺,但他忽然跳Tone再說:「但我知一定有咸濕仔諗咸濕嘢,我都唔怪你,我自己都係咁諗!」 ========================== HONG KONG SINGER CHANNEL 💛唱出心聲💛活出生趣💛音樂|生活|電影💛 Follow我哋👇🏻👇🏻🥰🥰 ▶️Facebook: Hong Kong Singer Channel ▶️Youtube: hksingerchannel ▶️Website: www.hksingerchannel ▶️Instagram: hkscchannel #hksingerchannel#hongkonsingerchannel#香港歌手#hksinger#hksinging#hkscchannel#歌手#hkig#ERROR#肥仔#梁業#193#DearMAMA

11 views0 comments

Comments


bottom of page